آفتاب احمد خانزاده

آفتاب احمد خانزاده: مشھور ليکڪ، صحافي ۽ سياستدان آفتاب احمد خانزادو 15 جنوري 1960ع تي، حيدرآباد ۾ پيدا ٿيو. سندس والد سليم احمد خان جو تعلق راجستان جي الوَر رياست سان هو ۽ ورهاڱي کان پوءِ حيدرآباد ۾ اچي رهيو. سندس والد جي ٽنڊي الھيار لڳ ڪاماري شريف ۾ وڏي زمينداري هئي. آفتاب احمد خانزادي، ايم. اي معاشيات جي ڊگري گورنمينٽ ڊگري ڪاليج لطيف آباد مان حاصل ڪئي. ڪئنٽونمينٽ هاءِ اسڪول ۾ پڙهڻ دؤران هن جو سنڌ نئشنل اسٽوڊنٽس فيڊريشن جي عھديدارن سان تعلق جُڙيو، جتي هن جي ملاقات قاضي سليم، قاضي اسلم، رفيق پٽيل، مختيار عاقل، نظير عباسي ۽ سرفراز ميمڻ سان ٿي. سياسي سرگرمي سبب ڪئنٽونمينٽ هاءِ اسڪول مان رسٽيڪيٽ ٿيو، پر بعد ۾ قاضي اڪبر جي سفارش سان، ٻيھر اسڪول وڃڻ شروع ڪيو. گورنمينٽ ڪاليج ڪاري موريءَ ۾ پڙهڻ دؤران SNSF جو عھديدار پڻ چونڊيو ويو. 1990ع ڌاري سندس دوست ڊاڪٽر امير الدين جڏهن لياقت ميڊيڪل ڪاليج ۾ پڙهندو هو، ته ايل. ايم. سي جي انٽرنئشنل هاسٽل تي سندس ملاقات امداد چانڊيي ۽ سھيل سانگي سان ٿي. ساڳئي سال حيدرآباد ۾ رهڻ دوران هن ‘وطن پرست تحريڪ’ نالي سان هڪ سياسي تنظيم جو بنياد وڌو، جنھن جي رد عمل ۾ ايم. ڪيو. ايم وارن سندس گهر تي فائرنگ ڪئي، جنھن کان پوءِ هو لڏي اچي ڪراچيءَ ۾ رهيو.
رفيق پٽيل سان گڏ، ڪراچي يونيورسٽيءَ ۾ سياست ڪرڻ وقت هن ڪراچيءَ جي سياست جو ويجهڙائيءَ کان مشاهدو ڪيو. ان دؤران سندس ملاقات نثار احمد کھڙي ۽ مظفر شجراع سان ٿي، تنھنڪري کاٻي ڌر واري سياست کي الوداع ڪري پاڪستان پيپلز پارٽيءَ ۾ شامل ٿيو. 2002ع ۾ بينظير صاحبه جي هدايتن موجب، پيپلز پارٽيءَ جي ٽڪيٽ تي لطيف آباد جي تڪ 49- PS (هاڻي PS-64) تان ايم. ڪيو. ايم خلاف چونڊ پڻ وڙهيو. اردو ادب سان گھري لڳاءُ سبب هن رضيه بٽ، ابن صفي، ڪرشن چندر، منٽو، فيض احمد فيض، حبيب جالب، ساحر لڌيانوي ۽ مصطفيٰ زيدي جي ڪتابن جو مطالعو ڪندي، هن لکڻ جي شروعات 1999ع کان ڪئي. سندس پھريون مضمون روزنامه ’جرأت‘ ۾ ڇپيو. ان کانپوءِ لاڳيتو سندس مضمون ’عبرت‘، ’عوامي آواز‘، ’هلچل‘، ’هلال پاڪستان‘ ۽ 2008ع کان روزاني ’ايڪسپريس‘ ۽ ’ڪاوش‘ ۾ ڇپجڻ شروع ٿيا. ان کان علاوه Express Tribune ۾ هر پنڌرهين ڏينھن سندس ڪالم شايع ٿيندو آهي. 1990ع ۾ سندس شادي حيدرآباد ۾ ٿي. سندس ڇپيل ڪتابن جو تفصيل هيٺين ريت آهي:
Queen of People: Benazir Bhutto (1)
(2) Bhutto is Alive
(3) سنڌ اور پيپلز پارٽي
(4) سنڌ ڪي محروميان ڪيسي دور هو سڪتي هين.

داخلا ۾ استعمال ٿيل تاريخون

1960.01.15  عيسوي

مشھور ليکڪ، صحافي ۽ سياستدان آفتاب احمد خانزادو 15 جنوري 1960ع تي، حيدرآباد ۾ پيدا ٿيو.

صحافي - ڀاڱي جون ٻِيون داخلائون